Ón lá inniu, is féidir le paisinéirí ar sheirbhísí rialta Nasc Áitiúil TFI Mhaigh Eo a dtáillí a íoc trí úsáid a bhaint as roghanna íocaíochta gan tadhall, lena n-áirítear cártaí dochair agus creidmheasa, chomh maith le tiachóga móibíleacha ar nós Apple Pay agus Google Pay.
Dheimhnigh an tÚdarás Náisiúnta Iompair gur éirigh le feidhmiú céimneach an chórais nua, tar éis thorthaí rathúla an chláir phíolótaigh tosaigh sa Chabhán agus i Muineachán, agus íocaíochtaí gan tadhall ar sheirbhísí Nasc Áitiúil TFI i dTiobraid Árann, Laois agus Uíbh Fhailí a tugadh isteach le déanaí.
Glacfar le híocaíochtaí gan tadhall le haghaidh táillí aon turais, agus leanfar de tháirgí laethúla agus seachtainiúla a bheith ar fáil trí shuíomh gréasáin Leap agus aip Leap Top-Up de chuid TFI. Is féidir le paisinéirí leanúint d’íocaíochtaí a dhéanamh trí Chártaí Leap TFI agus airgead tirim freisin, agus tá Cártaí Saorthaistil bailí go fóill ar gach seirbhís incháilithe.
Tá an t-uasghrádú mar chuid de chlár níos leithne de chuid ÚNI chun córais íocaíochta táille a nuachóiriú ar fud na tíre, rud a fheabhsóidh inrochtaineacht agus eispéireas foriomlán na bpaisinéirí, go háirithe do phobail i gceantair thuaithe agus réigiúnacha.
D’fháiltigh Edmund Betagh, Bainisteoir Cláir Nasc Áitiúil TFI ag ÚNI, roimh an bhforbairt. Dúirt sé:
“Cloch mhíle shuntasach d’iompar tuaithe i Maigh Eo is ea íocaíochtaí gan tadhall a thabhairt isteach. Tugtar níos mó solúbthachta do phaisinéirí i mbailte agus i sráidbhailte beaga leis maidir leis an gcaoi a n-íocann siad, agus neartaítear ról Nasc Áitiúil TFI i ndáil le pobail ar fud an chontae a nascadh.”
Dúirt Sarah Togher, Bainisteoir Ginearálta Nasc Áitiúil TFI Mhaigh Eo:
“Is céim thábhachtach iad íocaíochtaí gan tadhall chun iompar poiblí i Maigh Eo a nuachóiriú. Trí bhealaí tapa áisiúla íocaíochta a thairiscint, táimid ag déanamh níos éasca do phaisinéirí é taisteal go hinbhuanaithe agus na seirbhísí a theastaíonn uathu a rochtain.”
Le haghaidh tuilleadh eolais faoi sheirbhísí Nasc Áitiúil TFI Mhaigh Eo, tabhair cuairt ar https://locallinkmayo.ie/
